Татьяна Подлипская-Гришаева Пераможцаў літаратурнага конкурсу “З табой маё слова, Радзіма”, прысвечанага Году міру і стварэння, узнагародзілі ў музейным комплексе “Ляўкі”, які з’яўляецца філіялам Дзяржаўнага літаратурнага музея Янкі Купалы і знаходзіцца ў Аршанскім раёне на беразе Дняпра. Мерапрыемства прайшло ў рамках фестывалю “Дзеці за мір”.
— Другі год Магілёўскае абласное аддзяленне Саюза пісьменнікаў Беларусі ў цесным супрацоўніцтве з Магілёўскім абласным аддзяленнем Беларускага фонду міру праводзіць рэспубліканскі літаратурны конкурс “З табой маё слова, Радзіма”. Яго адметнаю рысаю стала вольная тэматыка вершаў, беларуская мова, — падкрэсліў старшыня Магілёўскага абласнога аддзялення Саюза пісьменнікаў Беларусі Аляксандр Казека. — Мы падводзім вынікі на знакавым месцы — у музейным комплексе “Ляўкі”, на дачы Янкі Купалы, а ў мінулым годзе віншавалі пераможцаў на Радзіме Якуба Коласа.
Пераможцаў з розных куткоў Беларусі віталі і ўручалі ім дыпломы з падарункамі старшыня Магілёўскага абласнога аддзялення Саюза пісьменнікаў Беларусі Аляксандр Казека і старшыня праўлення Магілёўскага абласнога аддзялення Беларускага фонду міру Андрэй Нікіцін. Так, дыпломы I ступені ў розных узроставых катэгорыях атрымалі Яўгенія Аўсеенка, вучаніца гімназіі з Быхава і Вольга Алізар з Гродна.
